Ministri Beqaj: Kosova është duke bërë hapa konkret për zhvillimin e sektorit të inovacionit dhe teknologjisë

 Prishtinë, 19 shtator 2018 - Ministri i Ministrisë së Inovacionit Besim Beqaj po merr pjesë në Festivalin e Inovacionit që po mbahet në Tiranë. Në dtiën e dytë të Festivalit Ministri Beqaj, në emër të Qeverisë së Republikës së Kosovës u është drejtuar pjesëmarrësve dhe kompanive që po prezantojnë punën e tyre në këtë ngjarje të rëndësishme të ekonomisë digjitale.

“Përkushtimi i politikave strategjike të Qeverisë së Republikës së Kosovës është riorientimi i ekonomisë, drejtë ekonomisë digjitale, në këtë drejtim Kosova është duke bërë hapa konkret për zhvillimin e sektorit të inovacionit dhe teknologjisë”, theksoi Ministri Beqaj.

Ai po ashtu ka thënë se Kosova është e përkushtuar në krijimin e mundësive për zhvillim të ndërmarrësisë dhe iniciativës private përmes inovacionit, duke u përqendruar në zhvillimin e NVM-ve prodhuese dhe shërbyese, me synim krijimin e vendeve të punës, arritjen e një niveli konkurrues me ekonomitë evropiane.

Festivali i Inovacioni me karakter rajonal, po organizohet për herë të parë në Tiranë ku po marrin pjesë mbi 500 pjesëmarrës nga rajoni dhe më gjerë, ndërsa punën  e tyre në fushën e teknlogjisë dhe inovacionit po e prezantojnë 50 kompani të rajonit.

Ministri Besim Beqaj gjatë qëndrimit në Tiranë do të takojë Zëvendëskryeministren e Shqipërisë Senida Mesi dhe përfaqsues të tjerë institucionalë të Shqipërisë të sektorit të ekomomisë dhe inovacionit.​